لواء سامي دنيا يكتب...أخبار العالم العجيب

 

حصريا : من مكان واحد.. العالم اليوم على مسئوليتى الشخصية...اخبار العالم العجيب ...إيران

■ لا انا مش جاى أكلمكم عن المشروع النووى الإيرانى ولا الموقف السياسى ولا الكلام ده...!!■ أنا جاى أكلمكم عن أكبر كارثة إنسانية هتحصل فى إيران...!!■ هتقولى كارثة إنسانية إيه يا جنرال!!!■ باس يبقا حصل تسريب إشعاعى وكدا ... صح يا جنرال ؟؟

■ هقولك لاء للأسف!!!■ إيران بتمر بأكبر موجة جفاف فى تاريخها لدرجة...!!

■ وخد بالك من كلمة لدرجة ...

■ إن الرئيس الإيرانى بزشكيان طلع الإسبوع إللى فات وقال ... قد نضطر إلى نقل العاصمة الإيرانية لمكان تانى بسبب الجفاف...

■ مش كدا وبس...!!!■ دى الحكومة الإيرانية قررت إغلاق كل المراحيض العامة فى الشوارع لتوفير المياة!!!■ مش كدا وبس...!!

■ دى الحكومة كمان قررت إغلاق المدارس والجامعات وبعض المصالح الحكومية والعمل من البيت زى أيام كورونا!!!■ مش كدا وبس...!!!■ دا الحكومة الإيرانية بتقول إن العطش والجفاف فى العاصمة طهران هيجبر ١٥ مليون نسمة من سكان العاصمة إنهم يرحلوا إلى أماكن تانية!!! ■ هتقولى لا يا معالى الجنرال  إنت أكيد مكبر المواضيع وكدا!!!

■ هقولك لاء للأسف دا فى ٢٠ محافظة إيرانية هيموتوا من العطش من أصل ٣٠ محافظة!!! 

■ وإن الخزانات الإحتياطية يا دوب فيها أقل من ١٠٪ من الإحتياطى المائى فى الدولة!!!

■ وبكدا لا نفعهم النووى ولا نفعهم البترول إللى عايمين عليه والدولة هتنهار لوحدها لو ملقيوش حل لأزمة المياة دى!!!■ هتقولى الله والمشكلة دى سببها إيه أصلاً يا جنرال!!!

■ هقولك للأسف بسبب التغير المناخى إللى بسببه حصل ندرة لنزول الامطار ودا من سنين فاتت!!!■ لدرجة إن رئيس الدولة بزشكيان طلع وقال إن الحكومات السابقة هى السبب فى الكارثة دى علشان معملتش حسابها وموجدتش حلول لأزمة الجفاف دى!!!

■ هوب_دبل_كيك يا عزيزى متابع معالى الجنرال بعد ما عرفت المصيبة إللى حلت على إيران عايزك تشوف وتعرف الدولة المصرية عملت إيه!!!■ شوف_يا_سيدى...!

■ الدولة المصرية بقيادة السيسي أول ما مسك رئاسة مصر عمل حاجة يمكن ناس كتير متعرفش حاجة عنها...■ عمل تطوير فى سلاح فى الجيش المصرى إسمه سلاح المياه!!!

■ هتقولى لاء يا جنرال انت اكيد جاى تهزر!!!

■ سلاح المياه إيه فى الحر ده .....طبعا هتقولى مدفع مياه ولا خرطوم مية ؟؟

■ هقولك إنت اللي كدا بتهزر!!!

■ شوف يا سيدى ...■ سلاح المياه مكون من فرق وكتايب ولواءات زية زى المشاه والمدرعات والقوات البحرية كدا ....الخ!!!

■ إنما سلاح المياه فى الجيش المصرى مكون من خيرة شباب مهندسين وعلماء الرى وعلماء المناخ وعلماء الجولوجيا وعلماء التربة فى مصر وعلماء الفضاء وعلماء الفلك!!!

■ و دول بقا شغالين  فى صمت تام ولا حد حاسس بيهم رغم....!!■ إنهم عملوا أكبر مشاريع مائية فى العالم...!!■ دا مش كلامى حضرتك ولا هبد منى...!!■ دا كلام الأمم المتحدة إللى قالت ....■ مصر فى خلال ٨ سنين نفذت أكبر مشاريع مائية فى العالم، من مشاريع تحلية مياه البحر زى محطة بحر البقر ومحطة الجلالة ومشاريع معالجة مياة الصرف، دا غير سحارات سرابيوم وقناطر أسيوط، دا غير النهر الصناعى والدلتا الجديدة، دا غير بحيرات توشكى الصناعية إللى لحد دلوقتى العالم كله بيسأل هي مصر بتخزن المية دى كلها هناك ليه!!!■ طب أبهركم بالرقم إللى مصر إستثمرته فى محطات تحلية مياه البحر!!!

■ مصر لحد دلوقتى عملت ٦ محطات تحلية مياة بحر ب ٢ مليار دولار...!!

■ آآآآآه بجد!!!طيب اه والله.■ دا علشان الناس اللي بتسأل هو السيسى بيودى فلوس مصر وديون مصر فين!!!■ بس السيسى مش هيكتفى ب ٦ محطات بس!!!■ دا فى خطة قومية شغالة لبناء ٣٩ محطة تحلية مياه بحر لحد سنة ٢٠٣٥ ب ٥٠ مليار دولار حضرتك!!!

■ السيسى مش بيبنى مصر وبس...!!

■ السيسي بيأمن مستقبل مصر المائى!!!

■ علشان لو حصل عوق من المناخ أو حصل جفاف فى الأمطار فى إثيوبيا  يبقا المحطات دى تغذي مصر كلها!!!■ السيسى ده لو بيفتح المندل ولا بيقرأ الطالع مش هيعمل إللى بيعمله ده بجد من سنة ٢٠١٦ ..■ بس السيسى لا بيفتح مندل ولا بيقرأ الطالع ..■ السيسى بينه وبين الله عمار!!!…. هذا ظنى بالله .

🔥 وع_الناحية_التانية_من_العالم...

===== السعودية....

■ نيويورك_تايمز قال إيه صحيوا من النوم وعملوا تحقيق إستقصائى عن جيفرى_إبستين الملياردير الشمال، إللى كان عامل جزيرة لرؤساء العالم علشان يعملوا سيكو سيكو مع العيال الصغيرة هناك .... الكلام_دابجد ... وفى فطاحل من زعماء العالم عاملين عضوية!!!

■ وسبحان الله يا مؤمن إفتكروا يدخلوا بيت الراجل إللى مات من ييجى خمس سنين وهما بيصوروا بالكاميرا ف اوضة نومه لقيو صورة محمد بن سلمان منورة فوق التسريحة جمب كريمات الشعر والبرفانات!!!

■تقولش ياخويا صورة الدخلة!!!■ طب ها وبعدين!!!■ وبس كدا!!!■ مش محتاج أقولك المفروض نسأل السؤال المهم ؟؟

■ يا_ترى_بيبتزوا_بن_سلمان_بإيه ؟؟

■طب_ترامب_وإبتزوه_خلاص_وبقا_إسرائيلى أكتر من الإسرائيليين نفسهم!!!!■ يا ترى عايزين إيه من محمد بن سلمان ؟؟

■ وبيقولوله يا توافق .... يا إما الفضيحة!!!

■ من وجهة نظرى إنهم بيبتزوه بالتطبيع وش بدون أى مقابل يا إما يتفضح!!!■ دا كدا مبقاش الأمير الطموح..... كدا بقا الأمير المفضوح ودا يفسرلك سر لوغاريتمات سياسة السعودية!!! ■ شوية تبقا معانا ..... وشوية تبقا ضدنا!!!■ إنه الإبتزاز يا عزيزى..... يا إما الفضيحة!!!■ النهاردة قناة الحدث السعودية بتقول إن السعودية اتبرعت ب ٦٠٠ شاحنة مساعدات!!! ■ أكيد لغزة يا معالى الجنرال..... تؤتؤ . ■ طب  للسودان ....تؤتؤ ..■ يبقا أكيد للصومال..... تؤتؤ ..■ ما هو كدا مفيش غير اليمن يا جنرالنا ؟؟■ لاء برضوا!!!

■ السعودية إتبرعت ب ٦٠٠ شاحنة مساعدات للسويداء السورية للدروز حضرتك إللى هما تحت حماية إسرائيل ونايمين فى حضن إسرائيل حضرتك .... صدقونى كوميديا سوداء!!! ■ بس دا يخليك تفهم وتعرف تصريح السيسى سنة ٢٠١٧ إللى قال فيه....أنا معنديش فواتير لحد .... ولو أعرف أبيع نفسى كنت بعت، بس أنا مصرى وبحب بلدى وهفضل أدافع عنها ومعنديش حاجة حد يبتزنى بيها... ■ ساعتها ناس كتير إتريقت وكوميكس سخيفة عليها من الإخوان ...

■ والشعب المصرى مكنش فاهم معنى التصريحات دى ولا إيه سببها!!!■ النهاردة وبعد إللى بيحصل من إبتزاز لرؤساء العالم وبن سلمان وترامب وسيديهاتهم إللى بتطلع نقدر نفهم تصريحات السيسى من سنة ٢٠١٧ ..

■ هو تقريباً كدا السيسى أنضف وأشرف رئيس فى العالم!!! تقريبا ايه هو كده فعلا انضف واشرف رئيس فى العالم المتعاص من اوله الى آخره.■ دا طلع كل رؤساء الإتحاد الأوروبى ورؤساء وأمراء عرب زباين فى الجزيرة بتاعت السيكو سيكو حضرتك!!!■ ينهار إسود ع المسخرة!!! …. ايوه مسخرة حرفيا .

🔥 وع الناحية التانية من العالم ....

===== الهند....■ بعد ما رئيس الوزاراء الهندى راح وقابل ترامب من شهرين ....

■وأخده بالحضن وباسه من بوقه بوقه ووقع معاه إتفاق إقتصادى وطلع بعدها ترامب وقال عنه إنه كلب وفى!!!■ النهاردة ترامب بيوقع عقوبات  إقتصادية على أى حد بيستورد البترول الروسى..!!■ هتقولى طب والهند مالها ومال البترول الروسى يا معالى الجنرال؟؟

■ آه مأنا نسيت أقولك إن الهند بتعتمد على ٣٥٪ من إستهلكها للبترول على البترول الروسى حضرتك وخصوصاً إنها بتاخده بنص التمن من روسيا!!! ■ يعنى لو برميل البترول ب ٨٠ دولار فى السوق العالمية الهند بتاخده من روسيا ب ٤٠ دولار!!!■ طبعا  الهند كدا وقعت مع أمريكا!!!■ أمريكا أصلاً فارضة إتاوة على الهند ٢٥٪ من منتجاتها وهتلبس ١٠٪ كمان عقوبات بسبب البترول الروسى!!!■ كدا الهند لبست ٣٥٪ إتاوة على كل منتجاتها إللى بتصدرها لأمريكا!!!■ طب_الهند_بتصدر_بكام ؟؟

■ الهند بتصدر لأمريكا سنوياً ب ٦٤ مليار دولار حضرتك!!!■ علشان كدا رئيس الوزاراء الهندى صحى النهاردة الصبح وعصر على نفسه لمونة وطلع جرى على مين ؟؟■ ع الصين حضرتك وقالهم الحقونى ... أنا واقع فى عرضكم!

■ الرئيس الصينى قاله..... تعالى لحموووو!!!تعالى حبيبي تعالى لحموووو يا وله.

■ ما قولنالك من زمان الأمريكان ملهومش أمان!!!■ والبريكس هى الحل...... لا مش زى الإسلام هو الحل حضرتك!!!■ وإنت قعدت ترفس زى الحمار وتقول أنا أمريكانى أكتر من الأمريكان نفسهم!!!■ النهاردة وبعد فرض العقوبات على الهند من أمريكا، رئيس الوزاراء الهندى فى الصين لأول مرة من ست سنين، ولو التحالف ده تم بجد بين الصين والهند وروسيا ضد أمريكا ..... يبقا باى باى أمريكا!!!..شكرا.

🔥 وع الناحية التانية من العالم ....

==== أمريكا ....■ فى امريكا بقا ... والحلوة خوخة إللى جت بعد دوووخة وقعت!!!

■ آه حضرتك فى طيارة F 35 إللى هى تحفة التكنولوجيا العسكرية الأمريكية وقعت الإسبوع ده وهى بتقلع من قاعدة إيلسون الجوية ف ألاسكا!!!■ بس الحمد لله الطيار أخد الكرسى وطار ولحق نفسه ومتبقاش من الطيارة غير الكرسى حضرتك..... آه بجد!!!… مش هزار.

كمان_فى_أمريكا ....■ ترامب النهاردة طلع وهدد....!!■ طبعاً هدد روسيا يا جنرالنا ....؟؟؟

■ لاء ..■ يبقا أكيد هدد الصين ؟؟■ برضوا لاء ..■ يبقا هدد إيران...!!!■ يا عم هى إيران ناقصة..... دول هيموتوا من العطش!!!

■ أومال هدد مين يا جنرال ؟؟■ هدد واشنطن العاصمة!!!■ اه بجد .... الراجل طلع النهاردة وهدد العاصمة واشنطن لو مسيطروش على معدلات الجريمة عندهم هيحطهم تحت وصاية الحكومة الفيدرالية!!!

■ آه مأنا نسيت أقولكم إن معدلات الجريمة فى واشنطن إللى هى عاصمة أمريكا من أعلى المعدلات فى العالم!!!■ أعلى ايه بس....!!!

■ دا فى مناطق وأحياء كاملة فى واشنطن البوليس بيقولك لو مشيت فيها بعد الساعة خمسة المغرب إحنا مش مسؤلين عن سلامتك ...أيوه حضرتك!!!■ آه بجد، سيبك من أفلام هوليود إللى بتشوف فيها المواطن الأمريكى أول ما بيطلب النجدة بتجيله قبل ما يتصل، وتقوله إحنا حسينا إنك محتاجنا!!!

■ دا كلام افلام أمريكانى حضرتك!!! 

■ بقولك فى أحياء كاملة فى أمريكا ممنوع المشى فيها بعد الساعة ٥ مساءاً!!!

■ إنما تطلب النجدة وتجيلك ....

■ دا مبيحصلش غير فى مصر بجد ....دا إنت يا مؤمن بتنزل الفيديو ع السوشيال ميديا من هنا ... والداخلية بتجيب المجرم بلبوص قبل ما يقلع بوكسره حتى لو مفيش بلاغ أو محضر بالواقعة حضرتك!!!…. تحيا مصر حبيبتي.

🔥 وع الناحية التانية من العالم ....

==== سويسرا....■ يا روح قلبى  .... ملوك الشيكولاتة!!!■ طلعت رئيسة وزاراء سويسرا كارين كيلر سوتر فى اليوم الوطنى لسويسرا وقالت.... أشعر بخيبة امل!!!■ ليه يا بنت قلبى....!!! ■ ما عاش إللى يحسسك بخيبة الأمل يا أختى ■ كارين سوتر كملت وقالت....

■ أنا بشعر بخيبة أمل بسبب الرسوم إللى فرضتها واشنطن على سويسرا إللى

 تعدت ٣٩ ٪ ..■ ودا هياثر على الإقتصاد السويسرى وهيزود التضخم وإحنا مش عارفين نعمل إيه!!!■ هو إنتوا كمان عندكم تضخم...... قطعتى قلبى ياختى بجد! 

■ يقطع ترامب ياختى ويقطع الرجالة كلهم علشان خاطر عيونك!!!عالم فعلا عجيب.

🔥 وع الناحية التانية من العالم ...

==== تركيا....■ اليومين إللى فاتوا صدر تقرير خطير من المخابرات التركية بتوصى فيه ببناء الملاجئ والإستعداد للحرب!!!

■ الحرب مع مين يا أغا!!!■ قالك الحرب مع إسرائيل...!!■ إزاى يا جدع دا إنتوا نايمين صاحيين سارقين ناهبين مع بعض!!!

■ قالك السبب فى التقرير ده حرب ال ١٢ يوم مع إيران!!!■ وإن على تركيا إنها تاخذ الحذر بعد سقوط إيران!!!■ والتقرير بيوصى بدراسة نقاط القوة والضعف فى الجيش الإسرائيلى على ضوء حربه مع إيران!!!■ وإنه لازم يستعد!!! 

■ بس لفت نظرى فى التقرير الطويل العريض إللى قعدت يومين أقرأ فيه الفقرة دى...

■ ثالثاً: لفت الأنظار إلى ضرورة الإهتمام بالسلام الداخلى، وتحقيق الإستقرار السياسى والإجتماعى، حيث أبانت حرب الـ 12 يوماً كيف تسللت إسرائيل إلى تلافيف المجتمع الإيرانى، على وقع الظروف الإقتصادية الصعبة.....!!

■ رابعاً: ضرورة إهتمام تركيا بحماية النخب العسكرية والمدنية المنوط بهم إدارة أى صراع محتمل مع أى قوة خارجية!!!

🔥 وع الناحية التانية من العالم....

.                       🟣 فى  مصر حبيبتي🟣

🟣 وفى تحيا_مصر....

■ مجلس الذهب العالمى طلع النهاردة وقال، هى مصر بتعمل إيه..!!■ دى مصر فى خلال الخمس شهور إللى فاتوا زودت إحتياطى الذهب بتاعها طن ونص ؟؟■ وأصبح إحتياطى الذهب فى البنك المركزى المصرى ١٢٨.٤ طن وبقت خامس أكبر إحتياطى عربى!!!

■ وبقت فى المركز ال ٣٤ عالمياً!!!

■ مش كدا وبس...!!!■ دا إحتياطى العملات الأجنبية خلاص بيلامس ال ٥٠ مليار دولار!!!

■ هو السيسي بيجيب الفلوس دى كلها منين ؟؟■ وبيجهز مصر لإيه ؟؟؟■ دا مِفَهِم العالم كله إنه معندوش.... وهو عنده جُوا!!!

■ وفى عز ما العالم كله بيعانى من التضخم والتعريفات الجمركية والأزمات الإقتصادية هو بيبنى وبيشتغل وبيعمل مشاريع ومصانع!!!

■ بس مش مجلس الدهب العالمى إللى إتكلم وبس...!!■ لا دى ديلى نيوز البريطانية الإسبوع ده طلعت وقالت....إن السيسى نقل مصر من دولة فقيرة تستورد لعب أطفال من الصين .... إلى دولة كبرى تصنع الطائرات والدبابات والبوارج الحربية، والصواريخ وتسيطر على شئون البحر المتوسط بكنوزه وخيراته....!!!

■مش كدا وبس.....!!■ دى طلعت مؤسسة نايت فرانك العالمية وقالت إن سوق الإنشاءات فى مصر يبلغ ٥٥٠ مليار دولار وتم إسناد مشاريع للشركات الإنشائية  ب ١٢٠ مليار دولار قيد التنفيذ!!! ■ يعنى_إيه الكلام ده يا معالى الجنرال؟؟■ يعني البلد شغالة ومش واقفة مستنية حسنة من حد!!!■ يعني البلد بتبنى فى مشاريع مليارية!!!■ يعني البلد ماشية فى الطريق الصح.... طول ما إنت بتبنى ... ودا إللى مجننهم من السيسى ...إنه مبيهمدش... شغال ومش عايز يقف!!!خمسة وخميسة فى عين اللى يجيب سيرة السيسي زعمنا وزعيم المنطقة كلها وميصليش على النبي ويقوم ماشاء الله تبارك الله اصلى بنخاف على رئيسنا من العين والحسد…… ايوه ومن شر حاسد اذا حسد.🟣 كمان فى تحيا مصر.....■ رئيس أركان الجيش الإسرائيلى طلع إمبارح ورقع بالصوت وقال.... استمرار الحرب فى غزة إستنزاف خطير لقواتنا العسكرية!!!

■ خد بالك إن غزة دى أوضتين وصالة وبقالهم سنتين بس!!■ ما_بالك_بقا إن الجيش المصرى قعد يطهر سيناء

 ٧ سنين!!■ سيناء إللى بتمثل تلت مساحة مصر!!!■ أنا فاكر سنة ٢٠٢٣ طلع السيسى وقال تصريح يمكن ناس كتير متاخدش بالها منه ...■ طلع وقال إن تكلفة الحرب فى سيناء فى الشهر مليار جنيه دا أكل وشرب ومعدات وسلاح فى سيناء بس!!!■ يعنى الجيش المصرى كان بيتكلف شهرياً مليار جنيه لتطهير سيناء من الإرهاب!!! ■ المشكلة مش ف كدا...!!■ المشكلة إن كان فى نفس الوقت تلاقى ناس ولاد ستين كلب بيطلعوا يقولوا إن السيسى هيسلم سيناء!!!الناس دى عاوز تنضرب باوسخ قبقاب.

■ أنا_بقولكم_الحقايق_دى_ليه ...؟؟

■ علشان أعرفكم الفرق بين الجيش الإسرائيلى إللى تايه فى أوضتين وصالة ومش عارف يسيطر عليهم، وبين الجيش المصرى إللى كانوا بيشتكوا من القوة الغاشمة إللى كان بيتعامل بيها مع الإرهابيين!!!■ لو إنت فاكر إن إسرائيل وأمريكا مش عارفة قدرات الجيش المصرى ولا خايفة منه ..... تبقا أهبل!!! 

■ علشان هما أصلاً مش خايفين غير من الجيش المصرى وعاملين ليه الف حساب!!!

■ دول لو شاكين ١ ٪ بس فى قدراته كان زمانهم النهاردة قاعدين معايا فى جنوب سيناء او فى الساحل  الشمالى الشرير حضرتك!!!

■ إحنا فى زمن مبيعرفش غير القوة الغاشمة!!! ■ والنظام الدولى حالياً مبيحترمش غير الأقوياء!!!■ وهما مش لسه هيجربوا قوتك...!!!■ لا حضرتك إنت قعدت سبع سنين بتحارب منتخب العالم من المجرمين والإرهابيين فى سيناء بمساعدة مخابرات أهل الشر إللى كانت بتواجهك فى سيناء!!!■ بس الجيش المصرى فرمهم وعرفهم تمامهم!!!■ وقالهم ملكوش عندى غير القوة الغاشمة!!!■ ف أنا مش مستغرب من تصريحات محافظ شمال سيناء ولا متفاجئ منه!!!■ سنة ٧٣ الإتحاد السوفيتى إتفاجئ بالسلاح إللى كان مع المصريين!!!

■ آه ما هو كان بيمدنا بالسلاح وإتفاجئ إن السلاح السوفيتى مصر أخذته وطورته!!!

■ علشان كدا محافظ سيناء طلع وقال هما مش هيتفاجؤا بإللى يعرفوه وبس...!!!

■ دول هيتفاجأوا بإللى ميعرفهوش!!!

🟣 كمان فى تحيا مصر....روحى وقلبي.

■ لو عايز تعرف إسرائيل هتركع لمصر ولا لاء ؟؟■ يبقا لازم تعرف إن النهاردة إسرائيل وقعت على تغيير إتفاقية توريد الغاز لمصر لمدة ٤٠ سنة ومش بمزاجها..... لاء دا غصب عنها!!!■ ليه غصب عنها يا معالى الجنرال !!!

■ دا بقا إللى هنشرحة ف أخبار العالم المتعاص  إللى جاية علشان طولت عليكم ..

■كفاية كدا علشان النهاردة السبت  والناس عاوزة تتفرج على اى حاجة كوميدية تلطف الجو ده …… ودائما نحمد ربنا …. وإذكروا الله كثيرا لعلكم تفلحون.