صراع النجومية يشتعل.. الأجر أم التأثير يحسم المعركة
الصحفية/نهي احمد مصطفى 🇪🇬
عاد الجدل حول معنى النجاح الفني ليفرض نفسه بقوة على السوشيال ميديا، بعد تصريحات أحمد العوضي الأخيرة اللي أكد فيها إنه الأعلى أجرًا والأكثر مشاهدة، وكشف في نفس الوقت عن تفاصيل مسلسله الرمضاني الجديد «علي كلاي»، كلام فتح باب المقارنات على مصراعيه مع نجوم الصف الأول، وأشعل نقاش واسع بين الجمهور.
ما هي إلا ساعات، ودخل محمد رمضان المشهد بأسلوبه المعتاد، من غير ما يذكر أسماء، لكن برسائل ذكية ومباشرة في معناها. رمضان قال جملة واحدة قلبت الموازين فيه ناس بتنجح، بس مفيش حد بيأثر في الشارع زيك. جملة اعتبرها كثيرون ردًا غير مباشر، لكنها كافية تشعل الترند وتشعل المقارنات.
محمد رمضان استغل اللحظة وكشف جزء من فلسفته في النجاح، مؤكدًا إن الأرقام وحدها مش معيار، وإن التأثير الجماهيري الحقيقي هو اللي بيصنع النجم ويخليه حاضر في الشارع قبل الشاشة. وأوضح إن طموحه في بدايته كان بسيط، لكنه تحوّل مع الصعوبات والتحديات لطموح شرس، سواء في التمثيل أو الغناء.
وتحدث رمضان عن خطوة دخوله عالم الغناء، واللي وقتها كانت مغامرة محسوبة ضده مش لصالحه، لكنه أصر يكمل الطريق، معتبر إن الجرأة والمخاطرة جزء أساسي من صناعة النجومية.
كمان علّق على الهجوم اللي اتعرض له بسبب ظهوره في مهرجان كوتشيلا، وقال إن الانتقادات العنيفة كانت سبب مباشر في تحقيق فيديوهاته مشاهدات ضخمة، وإن الجدل نفسه بقى عنصر أساسي في اللعبة، يخلي اسمه دايمًا حاضر في الصدارة.
بعدها اشتعلت المقارنة بين محمد رمضان وأحمد العوضي على مواقع التواصل، ما بين جمهور شايف إن الأجر الأعلى دليل النجاح الحقيقي، وآخرين مؤمنين إن التأثير في الشارع هو المعيار اللي ما يتزوّرش… والجدل لسه مفتوح.
0 تعليقات